SD Amorebieta 2-0 SD Eibar B: Urdinen garaipen sinesgarria

Urdinek Eibar B mendean hartu dute talde osoaren partida oso serio batean, bosgarren jardunaldiz jarraian atea hutsean utzi ondoren. Markagailura igo diren bi golak bigarren zatian iritsi dira, Rekak eta Hodei Rodriguezek sinatuta. Amaierarako bost jardunaldiren faltan, SDAk 11 puntuko errenta lortu du jaitsiera postuekiko eta 5 puntura jarri da igoera playoffekoetatik.

Lehen zatia izugarri berdinduta eta arriskurik gabe igaro da. Bi taldeak serio zeuden eta defentsak nagusitzen ziren. Panorama aldatu egin da azken txanpan, urdinek atzaparrak atera baitituzte. Izan ere, partidako lehen aukera 41. minutuan heldu da, Ceballosen zartako gurutzatua Bermejo atezainak gelditu duenean. Jokaldiak bizirik jarraitu du eta Ituartek berriz ere probatu du, baina bere jaurtiketak defentsa baten gorputzean jo du. 43. minutuan, urdinek baloia sareratzea lortu dute. Ceballosek erdiratu eta Zorrillak errematatu du atzelariari posizioa irabaziz. Hala ere, Urritxeren sinesgaiztasunaren aurrean, epaileak ustezko falta bat adierazi du erasoan eta gola baliorik gabe utzi du.

Lehen zatiaren amaiera ona bigarrenean gertatuko zenaren aurrerapena izan da. Urdinak indartsu itzuli dira atsedenalditik, aurkariaren area inguruan jokatzen. Saria 60an iritsi da. Etxanizek erdiraketa bat jarri du area barruan eta Zorrilla beste guztien gainetik altxatu da baloia buruz ukitzeko Rekaren etorrerarako. Harrobiko jokalari zornotzarrak nahi bezala fusilatu du 1-0ekoa. Eibar B gora joan da gola jaso ostean eta berdinketa egiteko zorian egon da 64.ean, baina Marcos Perezen jaurtiketak egurrean jo du. Amaierarako ordu laurden bat falta zenean, Hodei Rodriguez elektrikoak tentsioa murriztu du Urritxen, 2-0ekoa lortu baitu gol polit batekin. Armaginen filialak aldea murriztu ahal izan du 82an, baina Zangoren geldiketa onarekin egin du topo. Bi goleko abantailarekin, gureek partida kontrolatzen jakin dute eta hiru puntuak eskuratu dituzte.