Javier Eraso, zelai erdi urdinerako esperientzia

Sociedad Deportiva Amorebietak Javier Eraso Goñi (Iruñea, 1990-03-22) fitxatu duela iragarri nahi du. Eskarmentu handiko erdilariak ia ehun partida jokatu ditu Lehen Mailan eta Zipreko ligako Akritas Chlorakas FC taldetik dator.

Osasuna eta Athletic Clubeko harrobietan hezi ondoren, CD Leganesera joan zen 2013ko udan, Bilbao Athleticen bere etapa amaitu ondoren. Talde madrildarrarekin Bigarren Mailara igotzea lortu zuen bere lehen denboraldian eta bigarrenean ligako 39 neurketa jokatu zituen zilarrezko kategorian.

Leganesen egindako lan onak Athleticera itzultzeko balio izan zion, 2015-16 eta 2016-17 kanpainetan lehen taldean aritzeko. Bere bi urteko etapa lehoi gisa amaitu ondoren Leganesera itzuli zen eta beste bost denboraldi jokatu zuen bertan: hiru Lehen Mailan eta bi Bigarren Mailan. Joan den udan esperientzia berri bati ekin zion Zipren. Akritas Chlorakasen egin zuen kanpaina bakarrean 36 lehia ofizial jokatu zituen, 6 gol sartuz eta 2 asistentzia emanez.

Ongi etorri SDAra, Javi!