SD Amorebieta, estadioan sexu-erasoei erantzuteko protokoloa ezarri duen LALIGAko lehen kluba

Sociedad Deportiva Amorebietak neurri aitzindaria hartu du estatuko futbol profesionalean. Estadioan sexu-erasoei erantzuteko protokolo bat ezarri duen LALIGA-ko lehen kluba izan da. Erakundeko segurtasun-zuzendaria den José Manuel López de la Manzanarak diseinatutako dokumentua denboraldi hasieran aurkeztu zitzaion LALIGAri, eta honek oso harrera ona egin zion ekimenari. Izan ere, talde zornotzarrari eskatu zion plan hori aurkez zezala LALIGA EA Sports eta LALIGA HYPERMOTION-eko segurtasun-zuzendariekin batera egindako batzar batean, gainerako klub profesionaletan ere ildo horri jarraitzeko eta neurriak hartzera gonbidatzeko.

Protokoloaren helburu nagusia pertsonen sexu-askatasunaren aurkako erasoak prebenitzea eta horiei ahalik eta erantzunik onena ematea da. Besteak beste, erasorik ez gertatzeko hainbat prebentzio-neurri jasotzen dira dokumentuan, hala nola estadioko eremu apartatuetan edo argiztapen eskasekoetan langileak izatea, adibidez komunetan edo aparkalekuan. Era berean, protokoloak azpimarratzen du nola jokatu behar den eraso bat gertatzen bada, eta erasoa jasan duen pertsonarekin zein ustezko erasotzailearekin jarraitu beharreko urratsak ezartzen ditu.

“Protokolo honek, eraso horiek gerta ez daitezen zenbait neurri ezartzeaz gain, neurketa batean sexu-erasoren bat gertatuz gero jarraitu beharreko jarraibideak ezartzen ditu: nola jokatu, nola jokatu biktimarekin eta erasotzailearekin, zer den delitua eta zer ez, zer gauza esan diezaiokegun biktimari laguntzeko eta zein ez…”, zehaztu du López de la Manzanarak. “Jende askok uste du futbol-estadioetan ez dela horrelako gauzarik gertatzen, baina vip eremuan, sarbideen kontrolean, aretozainetan dauden emakume horiek esaldi sexistak entzun behar dituzte. Egia da eraso fisikoak ohikoagoak direla beste giro batzuetan, baina zaleen artean ere gerta daitezke baimendu gabeko ukituak, adibidez “, gehitu du.

SDAk bere ekimenez egin zuen protokolo hori, legeak hala eskatzen ez badu ere. “Lehiaketari ekin aurretik, ohiko eta nahitaezko protokoloak aurkeztu behar izan genizkion LALIGAri, hala nola sarbideetakoak, ebakuaziokoak, larrialdietakoak… Protokolo hau egin eta gehitzea erabaki genuen, eta LALIGAri ideia asko gustatu zitzaion, nazio-mailan horrelako protokolo bat ezartzeko lanean hasteko asmoa baitu “, azaldu du erakunde zornotzarreko segurtasun-zuzendariak.

“Borondate onarekin eta lanarekin egin daitekeen guztia ongietorria da. Eraso sexistak prebenitzeko eta horien aurrean nola jokatu behar den jakiteko protokolo hau aurrera eramateko aukera planteatu zitzaigunean, ideia oso ona iruditu zitzaigun. Gaitz honen aurka borrokatzeko urrats hauek emateaz harro gaude”, azpimarratu du Jon Larreak, Sociedad Deportiva Amorebietako presidenteak. Izan ere, klubak oinarrizko futbolean ere ezarri du protokoloa, harrobiko entrenatzaileei prestakuntza eskainiz. “Praktikan jarri behar ez izatea izango litzateke albisterik onena, eta futbolaren inguruan eta edozein esparrutan horrelako erasorik gerta ez dadin kontzientziatzeko baliogarria izatea”, gehitu du Larreak.