SD Amorebieta 3-1 Gernika Club: Urdinak Federazio Kopako fase nazionalerako sailkatu dira Euskadiko finalean Gernikari irabazi ondoren
Urdinek Federazio Kopako fase nazionalerako sailkapena lortu dute, fase autonomikoaren finalean Gernika mendean hartuta. Aitor Zulaikaren mutilek 3-1 irabazi dute Urritxen jokatutako neurketan. Talde zornotzarraren golak Torrikok -lehen zatiko azken txanpan- eta Arzalluzek eta Zorrillak -bigarrenaren hasierako minutuan- sartu dituzte. Bisitariek 90 heltzear zenean makillatu dute markagailua.
Euri fin baina etengabearekin, derbia berdinduta hasi da, menderatzailerik gabe, zelai erdian borroka handiarekin eta areetan abagune gutxirekin. SDA abagune argia sortzeko zorian egon da hasierako txanpan, Marouane arean sartu denean, baina Zorrillaren bila egindako pasea Lorentek geldiarazi du salbatzaile. Neurketak abisu lotsatiekin jarraitu du, baina ez nahikoak markagailua irekitzeko. Partida atsedenaldira hasierako 0-0ekoarekin helduko zela zirudienean, aurkariaren atzealdean ulermen falta batek Torricoren eta San Nikolasen arteko buruz burukoa erraztu du. Aurrelariak atezainaren gainetik bidali du baloia eta, zutoinean jo ondoren, goleko marra gainditu du, urdinei abantaila emanez aldageletara joan aurretik.
Gureak bikain itzuli dira atsedenalditik. Torricoren aukera San Nikolasek gelditu du bigarren zatia hasi eta berehala, baina 48. Minutuan 2-0ekoa heldu da. Marouanek baloia jarri du area barruan, Ituartek pasatzen utzi du eta Arzalluz agertu da atzetik eskuadratik sartzeko. Urdinak ez dira konformatu eta erasoan jarraitu dute. Horrela, 56. minutuan Torrico area barruan bota dute eta epaileak penaltia adierazi du. Zorrillak jaurtitzeko ardura hartu du eta ez du huts egin. Torrico bera laugarren gola sartzetik gertu egon da 65.ean. Bere burukadak zutoinean jo du. Gernikak ere aukera ona izan du amaieratik ordu laurdenera, baina Altamirak hegan egin du gola saihesteko. Bisitariek ez dute amore eman eta azken unera arte estutu dute. Ahalegin horren saria 88an lortu dute, Frunizek behin betiko 3-1 ezarri duenean.
SD AMOREBIETA: Altamira, Entrecanales, Odei, Castañeda (77’ Mendibe), Ceballos, Hernáiz, Ituarte, Marouane (67’ Hodei Rodríguez), Arzalluz (77’ Goie), Zorrilla (73’ Etxaniz) eta Torrico (67’ Reka).
GERNIKA CLUB: San Nikolas, Asensio, Lorente, Berasaluze, Izan (69’ Zugazaga), Fruniz, Gorka Agirre (58’ Kortazar), Beñat Gómez (58’ Manex), Auzokoa, Unai Vélez (58’ Arberas) eta Herri (69’ Baqué).
Golak: 1-0: Min. 41; Torrico. 2-0: Min. 48; Arzalluz. 3-0: Min. 57; Zorrilla, penaltiz. 3-1: Min. 88; Fruniz.
Epailea: Sergio Fontecha Márquez. SDAko Rodríguez; eta Gernikako Gorka Agirre, Beñat Gómez eta Kortazar jokalariei atera die txartel horia.
