SD Amorebieta 1-1 Cultural Leonesa: Urdinek gehiago merezi izan dute liderraren kontra
Futbola ez da justua izan urdinekin, sari handiagoa merezi izan baitute Cultural Leonesaren aurka. Gorka Morenoren taldea liderrari irabazten lehenak izatetik oso gertu egon da, baina garaipenak 89. minutuan ihes egin du. Ordura arte, SDA nagusi izan da eta abagune ugari izan ditu. Atsedenaldira iritsi aurretik Herviasek egindako penaltia bakarrik sartu da, neurri handi batean Bañuz atezain bisitariaren geldiketa onak direla eta.
Gureak ondo sartu dira partiduan, serio eta indartsu. Neurketako lehen abisu garrantzitsua zornotzarra izan da. Carbonellek jaurtiketa gogorra egin du area ertzetik eta Bañuz luzatu behar izan da 18. minutuan 1-0ekoa saihesteko. Cultural Leonesak erantzun du Victor Garciaren bitartez, gurutzatuegi atera den jaurtiketa batekin. Gorka Morenoren gizonek aurkariaren area bilatzen jarraitu dute. Carbonell gol ikusgarria sartzeko zorian izan da 30. minutuan. Aurkari bi atzean utzita, ezin izan du Bañuz gainditu. Camachok, lesioaren ostean berriz jokatzeko prest, ezkerretik abiatu du motorra eta arean sartu da, beste arrisku ekintza bat sortuz. 42.ean Ben Hamed izan da area kanpotik gol izugarria bilatu duena. Berriro Bañuzek hegan egin du saihesteko. Bilatutako saria heldu da. Epaileak eskuz egindako penaltia adierazi du Bertoren erdiraketa baten ostean eta Herviasek ez du barkatu 11 metroetatik SDAri merezitako abantaila emateko atsedenaldira joan aurretik.
Bigarren zatia hasi eta berehala, Hervias area barrura sartu da bigarrenaren bila, baina Bañuzen beste geldiketa on batekin egin du topo. Cultural Leonesak aurrerapausoa eman du berdinketaren bila. Gureak sendo zeuden aukerarik ez emateko. Carbonellek Bañuzen beste esku handi bat aurkitu du 67. minutuan kontraeraso on batean. Marin ere saiatu da zartako batekin, gora joan dena. Carbonell berriz ere gola egitetik gertu ibili da azken txanpan sartuta. Futbolak ez ditu merezimenduak ulertzen eta, gaur, berriz ere agerian geratu da. 89.ean, kanpokoek berdinketa lortu dute Rodri Suarezen burukada batekin korner batean. Luzapenean, gureek sufritzen jakin dute, azken uneetan gora joan den liderraren aurka puntua lotzeko.
SD AMOREBIETA: Gaizka, Enol Coto, Amelibia, Kortazar, Camacho, Carbonell, Ben Hamed (78’ Coulibaly), Yuste, Hervías (62’ Iñigo Muñoz), Berto (66’ Mauro Bravo) eta Selma (62’ Álvaro Marín).
CULTURAL LEONESA: Bañuz, Víctor García, Fornos, Barriuso, Manu Justo, Luis Chacón (72’ Bicho), Víctor Ruiz (82’ Rodri Suárez), Sergi Maestre (53’ Presa), Álvaro Martínez, Anton Escobar (72’ Ian Martínez) eta Artola (82’ Txus Alba).
Golak: 1-0: Min. 44; Hervías, penaltiz. 1-1: Min. 89; Rodri Suárez.
Epailea: Imanol Irurtzun Artola. Txartel horiak: Yuste, Kortazar eta Berto SDAn; eta Maestre eta Barri bisitariak.
