Guillermo Fernández, bolbora gehiago urdinen erasorako

SD Amorebietak Guillermo Fernández Hierro (Bilbo, 1993-05-23) jokalariaren fitxaketa iragarri nahi du. Ibilbide arrakastatsua izan du aurrelariak: 200 partida baino gehiago jokatu ditu eta 40 gol inguru sartu ditu Lehen eta Bigarren Mailan, Estatuko futboleko bi maila gorenetan, Athletic Club, CD Leganes, Elche CF, CD Numancia eta Burgos CF bezalako taldeen koloreak defendatuz.

SDAko aurrelari berria Lezaman hazi zen Athleticen lehen taldera iritsi arte. 2013-14 denboraldian egin zuen debuta San Mamesen Levanteren aurkako ligako partida batean. Denboraldi horretan bertan sartu zuen bere lehen gola lehoi gisa, Real Betisen aurka. Hurrengo denboraldian lehen taldean sartu zen, Txapeldunen Liga jokatuz. Bere lehen gola txapelketa horretan Estádio do Dragão zelaian Portoren aurka jokatu zuen partida batean heldu zen.

2015eko udan Leganesera joan zen utzita eta Lehen Mailara igotzea lortu zuen. Athleticetik irten ondoren, Elche, Numancia eta Racing de Santanderren koloreak defendatu zituen Bigarren Mailan, 2020-21ean Burgosera joan zen arte Bigarren B Mailan jokatzeko. Denbora gutxirako, zilarrezko mailara itzuli baitzen Burgoseko taldearekin, 2021eko maiatzean Badajozen jokatutako playoffean igoera lortu ondoren. Burgosekin Bigarren Mailan 39 partida jokatu eta 8 gol sartu ondoren, hurrengo bi denboraldietan Lehen Federazioan aritu zen: 2022-23an Tarragonako Gimnastic taldean -berea izan zen SDAren porrota eragin zuen gola Nou Estadi Costa Daurada zelaian- eta 2023-24an Cultural Leonesan.

Azken bi denboraldietan, aurrelari urdin berriak Indiako eta Indonesiako maila gorenetan jokatzeko aukera izan du, North East United eta Semen Padang FC taldeetan hain zuzen ere. Athletic utzi eta hamar urtera, Guillermo Bizkaira itzuliko da talde zornotzarrari bere kalitatea, golak egiteko gaitasuna eta eskarmentua emateko.

Ongi etorri, Guillermo!